中環老尖旺投X 龍狗牛羊利橫財

猪拉多纳

22/01/2012


今日年廿九，《東方波經》邀得靚仔玄學大師陳子才師傅，以玄學角度預測兩場英超大戰！陳師傅表示是日屬水，波衫顏色以白、黑、藍最旺，曼聯本身着開紅色波衫，但作客阿仙奴須穿藍黑橫間球衣，兩大旺色上身，去到酋長球場可反客為主；不過朗尼流日有刑剋，易同球證霎氣，分分鐘入完波後收球證「紅色利是」！




陳師傅話，阿仙奴有主場之利當然有着數，不過兵工廠件紅色波衫唔係咁老利。紅色屬火，而藍黑均屬水，五行中水剋火，曼聯可謂剋到對手應一應。另一場曼城主場鬥熱刺，主隊着淺藍衫、客軍穿黑衫，兩隻色都有運行，計埋開賽時間等其他因素，今場戰情會好膠着，但陳師傅預計曼城能小勝。不過主隊前鋒阿古路是日運程麻麻，「天剋地沖」下或射柱射楣，更甚者會有受傷之虞。




陳師傅仲畀大量買波貼士讀者：「今日屬龍、狗、牛、羊者有橫財運，啱晒投X發新年財。另外，是日屬水，當中土剋水，大家可着米、黃、啡等『土色』投X；如去投X站買波，就宜到中環、尖沙咀及沙田買波，入到去選擇5號窗排隊。此外，今年正西位係財位，喺屋企於西位放盆水，亦可增加財運！」