曼聯誓剿利物浦

猪拉多纳

11/02/2012
文： 樂比堅尼

今晚英超早場上演「雙紅會」，「紅魔鬼」曼聯主場對「紅軍」利物浦。現時爭標進入直路階段，曼聯落後榜首嘅曼城兩分，今場贏波就可坐番「一哥」位，隨着主將朗尼上仗復出兼梅開二度，樂比仔相信「紅魔鬼」下半季開始嚟料，以佢哋主場食住利物浦嘅優良往績，今場可捧主勝！（有線200、300及204台(3D)


周六晚8時45分直播）


當記者幾日前問曼城領隊文仙尼爭標機會時，文仙尼話曼聯有能力贏晒餘下14場聯賽，呢句說話樂比仔相當認同，曼聯嘅可怕之處，就係當佢哋旺起上嚟嘅時候，可以遇神殺神，遇佛殺佛，踢得好固然可大勝，最得人驚係踢得差一樣贏，甚至連出咩陣容，收起咩人都影響唔到佢哋嘅表現。

紅魔撻着冇得擋

當然，一支球隊冇可能長期保持呢個狀態，但樂比仔卻有預感，曼聯下半季即將大爆發，因為曼聯比曼城優勝嘅地方，就係擁有豐富嘅爭標經驗，而且佢哋有一個贏過12次英超冠軍嘅領隊，所以喺處理關鍵球賽嘅表現，曼聯遠比其他球隊優勝，歐聯及足總盃出局，更可令費格遜心無旁騖，專心踢好聯賽。


事實上，曼聯近幾仗已有回勇迹象，上仗作客車路士喺落後三球嘅情況下連追三粒，興奮程度仲勁過全取三分，有望提升球員士氣，而艾舒利楊格同拿尼嘅復出，加上朗尼同查維亞靴南迪斯重拾射門鞋，亦大大增加曼聯嘅爭勝本錢。

紅軍作客唔夠鍊

利物浦今季對強隊有極佳演出，兩勝車路士，對曼聯一勝一和都係紅軍嘅代表作，但值得留意係利物浦近年作客奧脫福冇乜好收場，近六次輸咗五次，唯一贏嗰次曼聯係十人應戰，所以樂比仔仍對曼聯投信任一票！