紅軍着晒火玩殘紅魔！

猪拉多纳

11/02/2012
文： 阿占

英超3D「雙紅會」爆發！紅魔同紅軍一向勢成水火，今晚兩軍喺奧脫福交手，艾拉同蘇亞雷斯聚頭成為焦點！小弟唔敢講邊個啱邊個錯，只係知道艾拉係曼聯防線毒瘤，今場隨時畀蘇亞雷斯玩殘！曼聯防線有危機，紅軍個2倍「讓球客勝」抵玩！（有線200、204（3D版本）及300、廣東體育周六晚8:45直播）




利物浦今季雖然無份爭標，不過呢支傳統Big 4逢親同宿敵曼聯對碰，嗰陣火藥味永遠都係鬼死咁濃，家陣仲整單艾拉指控蘇亞雷斯種族歧視案，搞到「哨牙蘇」坐8場波監，紅軍上下仲唔當正曼聯係「殺父仇人」咩？




「餓虎」哨牙蘇擔正搏殺




蘇亞雷斯上仗刑滿復出，餓波咁耐，今場大有機會擔正，肯定搏晒老命！最過癮係紅魔左閘艾拉近期狀態大跌Watt，曼聯唔少失波都係喺左邊防線「出事」，仇人唔掂，蘇亞雷斯梗係「餓虎出柙」，食住個勢有仇報仇、p:踩多兩腳啦！




唔計蘇亞雷斯，查實利物浦近期狀態真係勁Sharp醒，仲要係遇強愈強嗰隻添！聯賽盃兩戰「一哥」曼城錄得1勝1和，之後喺足總盃直情踢曼聯出局，上場聯賽對熱刺亦係保持不敗，氣勢勁爆，想喺利物浦身上搵着數？真係難過登天囉！


曼聯艾拉變防線毒瘤


曼聯上場作客車路士落後3球追番3球，永不放棄嘅精神固然值得尊重，不過「紅魔球證」韋比先係最大功臣！大家有睇波都知，紅魔條防線真係勁唔穩陣，艾拉固然係罪人之一，不過中堅莊尼伊雲斯唔夠班、門將迪基亞甩漏多多，亦有一定責任，以佢哋條脆皮防線，想頂住「餓虎」蘇亞雷斯、弗爆殺手比拿美？貪啲啩！萬一又失波在先，今場冇咗福星執法，曼聯仲可唔可以絕地反擊？你哋話呢？

橫數千軍

曼聯小豆絕殺王

‧「小豌豆」近2次英超鬥紅軍，喺最後10分鐘都有士哥。

‧近7次英超交手4度輸波。

利物浦作客例降魔

‧古積特近3次對曼聯射入4球。

‧喺英超史上曾4次作客贏曼聯，僅次5次嘅車路士。

頂占筍盤：利物浦（讓球客勝）

有線球彩台主持阿占

電郵：soccer64@cabletv.com.hk PHONE波熱線：1831 678 「超級星期六」開放時間：周六晚10:00至周日凌晨3:30