射手馬約卡閃耀贊比亞

猪拉多纳

12/02/2012


非國盃決賽雙雄都有唔少進攻能手，科特迪瓦重用英超三叉戟杜奧巴、沙洛文卡勞及謝雲奴，贊比亞則有雙箭頭馬約卡同卡東高爭取士哥，兩軍各有千秋，激戰可期！




科特迪瓦球星如雲，隊長杜奧巴係精神領袖，呢位車路士射手今屆射入三球，成功撐起前線。杜奧巴兩個拍檔沙洛文卡勞及謝雲奴突破力強，於兩邊走位靈活，謝雲奴於阿仙奴表現備受批評，但返到國家隊非常醒神，四強戰對馬里射入奠勝球，屬前線另一危險人物。


卡東高喺河南搵食


贊比亞由馬約卡同卡東高於前線攻堅，兩人今屆同樣取得三個士哥，現時同杜奧巴並列射手榜首位，有力爭做神射手。馬約卡効力瑞士超球隊年青人，年僅廿一歲，佢早於○七年已代表國家隊，被視為非洲新一代星級前鋒；卡東高則於中超球隊河南建業搵食，今屆表現咁醒，隨時畀人挖角。