科特迪瓦強爆贊比亞

猪拉多纳

12/02/2012
文： 走肖

非國盃決賽今晚喺加蓬勁爆上演，由贊比亞同科特迪瓦爭逐冠軍，兩隊都唔會放軟手腳，不過科特迪瓦老大哥索高拿（上小圖）話明，成功捧盃就會淡出國家隊，難怪杜奧巴（右圖左）話等住開派對，希望拎住冠軍獎盃歡送老友，咁嘅情況梗係要熱捧1.44倍客W！（now676台周一凌晨3:00直播）




贊比亞繼74年同94年後再入決賽，全隊都話希望攞冠軍，獻畀93年因為出戰世盃外圍賽，遇上空難不幸身亡嘅贊比亞國腳。効力過比勒費爾德嘅贊比亞隊長卡東高更加話，捧盃機會可能呢世都唔會再有，而且佢同前鋒拍檔馬約卡今屆各入3球，腳風唔曳，有機會登上神射手寶座，既然贊比亞今屆贏過塞內加爾同加納，當然唔會喺決賽扯白旗投降。


大象國5戰全勝不失1球


不過咁，科特迪瓦今屆5戰全勝，1球都冇失過，教頭沙侯爾反覆話唔怕畀人鬧，堅持唔踢進攻足球寧願搞好防守，有態度值得撐。仲有呀，雖然索高拿名氣唔係科特迪瓦最高嗰位，但佢代表國家隊上陣超過100次，屬於目前科特迪瓦落場次數最多球員，杜奧巴都要畀面佢，賽前佢話預備好決賽後開派對，暗示要同呢位老友癲番晚，信佢捧客W啦！