敲尼科西亞「客勝」搵着數

猪拉多纳

14/02/2012
文： 查理阿蛋

尼科西亞爆冷成為首支打入歐聯16強嘅塞浦路斯球隊，今晚於首回合作客里昂絕對唔會打定輸數，皆因里昂班小將表現手騰腳震，嚟到歐聯大舞台隨時衰多鑊，小妹情願冷敲2.85倍「讓客」。（有線62及202周三凌晨3:45直播）


倒灶負卡昂羞家


里昂自換上加迪任教練後，就開始重用年輕球員，不過呢班小將質素麻麻，里昂上仗喺聯賽輸畀中下游分子卡昂，兩名僅20出頭嘅中場加連尼亞及干拿倫斯完全冇貨交，主將哥古夫狀態又繼續低迷，成班「娃娃兵」都缺乏經驗，今場真係未必贏到異軍突起嘅尼科西亞。




作為上屆歐聯四強分子，里昂喺今屆分組賽嘅演出可謂大走樣，如果唔係好神奇咁以7:1大炒薩格勒布戴拿模，根本冇可能出線，今仗面對分組賽3戰作客全部守和、兼有查拉林比迪斯狀態大勇嘅尼科西亞，喺主場失利一啲都唔奇！