布拉加搏歐霸唔「錫」身

猪拉多纳

14/02/2012
文： 走肖

今晚除咗歐聯，歐霸盃亦會上演兩場32強首回合，葡萄牙新貴布拉加會喺主場迎戰土超勁旅比錫達斯，朱楓撐硬1.62倍主W，皆因呢隊上屆亞軍9連勝弗到爆，對住傷兵滿營嘅「A貨葡軍」比錫達斯，有望領先首回合。（有線61、64、201及204周三凌晨1:30直播）




嚟自葡萄牙嘅布拉加近年進步神速，上年殺入歐霸盃決賽，今屆喺歐霸盃分組賽H組以次名出線，喺晉級過程中更只輸過一場，得以近6年嚟第5次殺入歐霸盃32強。




布拉加近9場比賽全勝之餘，今戰仲有由賓菲加外借嘅國腳級中場魯賓艾摩廉，同埋波圖外借嘅後衞米基爾盧比斯兩名新兵可以用，再睇埋佢哋近10次歐洲賽主場錄得7勝2和1負，集有利條件於一身。


比錫達斯連續4場不勝


喺E組首名出線嘅比錫達斯，今仗最大優勢，係有葡萄牙教練卡華赫爾倒戈，隊中更有曉高艾美達、哥利斯馬同沙保沙等6名葡萄牙球員在陣，可惜呢支土耳其勁旅4場波未贏過，今仗更有中場大將羅拔圖希拔傷咗腿筋打柴，土耳其國腳左閘伊斯美蓋巴斯亦因鼠蹊受傷上陣成疑，勢頹又殘陣，今晚破到蛋都偷笑啦！


歐霸盃賽制：


採主客兩回合淘汰制，今輪為32強首回合，若總比數相同，作客入球較多一隊晉級，再和則於次回合後加時。若加時入球數字相同，客隊將憑作客入球優惠晉級，若加時沒有入球，則需互射12碼決勝。