曼市雙雄全力爭「霸」

猪拉多纳

16/02/2012
文： 查理阿蛋

跌咗個橙，梗係想執番個桔！喺歐聯分組賽齊齊畢業嘅曼市雙雄，轉戰歐霸盃後今晚首次登場，其中曼城會挑戰衞冕嘅波圖，曼聯就硬撼老牌勁旅阿積士，兩軍領隊文仙尼同費格遜都話明，對呢個安慰獎志在必得，今晚攜手出擊，一於神阻殺神，佛阻殺佛。


耶耶托尼回歸唔同晒 藍月亮踢好「波」保Face


「藍月亮」再度升起！今晚曼城於歐霸盃32強首回合作客波圖，雖然主隊葡超主場52戰不敗，但接連失落本土盃賽嘅曼城，必須喺歐霸盃踢出「億萬」身價先保得住面子，加上主力已悉數歸隊，小妹對佢哋投以信心一票，平手盤推介1.93倍曼城啦！（有線61及201周五凌晨4:05直播）


波圖歐洲賽冇料到


小妹睇好曼城，最大原因係佢哋經已連環於歐聯、聯賽盃及足總盃出局，如果再喺歐霸盃提早畢業，呢支「億萬大軍」顏面何存？由於「藍月亮」嚟緊周末冇比賽，領隊文仙尼一早表明今場鬥波圖會排出強陣，實行與同市死敵曼聯由英超鬥到歐霸盃！




其實曼城唔係唔夠班踢歐聯，佢哋喺分組賽取得10分，喺其他組別幾乎肯定可以出線，出局都係因為同拜仁慕尼黑及拿玻里齊齊身處「死亡之組」咋。反觀波圖喺今屆歐洲賽不及上屆勇猛，作為歐聯小組首名大熱，竟然鬥唔過辛尼特及尼科西亞以8分出局，表現欠說服力，佢哋喺葡超就可以恰吓國內球隊，今次要鬥英超勁旅曼城就未必有運行喇。


曼城高柏尼復出


小妹捧「藍月亮」嘅另一原因係「中場發電機」耶耶托尼大有可能上陣，呢位前巴塞中場對上一次為曼城披甲，就係主場贈利物浦3蛋場英超，佢踢非國盃不在陣期間，「藍月亮」進攻組織即時鬆散唔少，防線亦走晒樣，8場比賽共失9球，失球比佢離隊前嘅8場4球多超過1倍，有佢喺度，成隊波真係脫胎換骨o架！




「藍月亮」有耶耶托尼回歸加上堪稱英超最佳中堅嘅高柏尼及時復出，絕對係一支超級強心針，足以抵擋由侯克領銜嘅波圖鋒線，適逢主隊中堅奧達文迪停賽，射手基巴拉奧比亦因傷缺陣，阿古路同大衞施華等攻擊手就可以盡情開火射死波圖啦！