費Sir撐新世代媲美巴塞

猪拉多纳

16/02/2012
文： 力奇

獲領隊費格遜自信擁有打入歐聯決賽實力嘅曼聯，今晚展開歐霸盃第一擊作客阿積士，力奇睇好佢哋可以開出1.73倍客勝。賽前費Sir已經保證強陣出擊，撞正主隊近排飽受董事局內亂困擾，戰績大跌，紅魔唔難輕鬆勝出呢場32強首回合戰事。（有線61及201周五凌晨2:00直播）


曼聯傑斯 艾拉冇隨隊


曼聯意外喺歐聯分組賽畢業，費Sir谷住一肚氣，日前力撐呢隊擁有眾多生力軍嘅新世代紅魔，話級數絕對唔會差得過巴塞同皇馬幾多。力奇非常認同費Sir嘅說話，包括韋碧克、菲爾鍾斯同湯卡華利等新兵質素非凡，史高斯同里奧經驗十足，再加上拿尼同朗尼等當打球星，紅魔陣容集合各種奪標元素，轉戰歐霸自然係爭標大熱。


阿積士近4戰得1勝


當然，唔少人都擔心曼聯踢歐霸盃，究竟會唔會派強陣出征，但費Sir已經承諾唔會玩嘢。再者，本周末英超暫停改踢足總盃，紅魔出局變咗冇波打，費Sir更加唔使留力，就算左閘艾拉同老將傑斯冇隨隊出征都問題不大。




阿積士呢邊，球會高層內亂，太上皇告魯夫早排告上法庭阻止董事局聘用尹戈爾做CEO，搞到滿城風雨。力奇對佢哋權力鬥爭唔感興趣，但毫無疑問球隊近排戰績的確受影響，歇冬後踢4場荷甲竟然只得1勝1和2負，聯賽榜排名跌到落第6位。球隊軍心受損，狀態下滑，就算有主場之利，睇怕都頂唔住紅魔。