史篤城擒「蝙蝠」報答瞓街撲飛Fans

猪拉多纳

16/02/2012
文： 亨格比利

歐霸盃32強首回合，史篤城（上圖左）會喺主場恭候華倫西亞，主隊球迷賽前天寒地凍都照樣瞓街撲波飛，為報答Fans今晚當然要踢番場好波，史篤城受讓平半一於要下盤。（有線64及204周五凌晨4:05直播）




史篤城咁叻仔殺到入歐霸盃32強，班Fans當然熱烈捧場啦，有球迷喺英國時間前晚凌晨3點開始喺球場售票處排隊，唔單只要出動晒全家總動員霸位，仲帶埋睡袋喺攝氏零度嘅天氣下瞓街，試問最近連輸3場嘅史篤城又點可以令球迷失望吖？即使實力唔係「蝙蝠兵團」嗰皮，今晚都一定會靠鬥志同對手搏盡！




到訪嘅華倫嚟緊周日要硬撼巴塞，有後顧之憂今戰未必會強陣出擊，況且首席門將迪亞高艾維斯同左翼佐迪艾巴都因病唔出得，對攻守兩瓣都有影響。齋秤人腳就一定係華倫佔優，但由於過於着重地面推進，對住史篤城呢啲爛仔波未必惡得出樣，讓波更信唔過喎！