阿布棄買孖寶隨時揼心口

猪拉多纳

21/02/2012

車仔老闆阿布拉莫域慳皮放生拿玻里？呢位俄羅斯富商原本有機會喺上個月一舉收購拿玻里兩位主將卡雲尼及咸錫，但之後又縮沙，球隊成績繼而每況愈下，如果車路士最終被拿玻里淘汰出局，相信阿布一定揼爆自己心口。

咸錫卡雲尼誓顯身價

早排曾經傳出阿布會喺冬季轉會市場用1.5億鎊增兵，其中用5,000萬鎊買卡雲尼，3,000萬鎊買咸錫，由於報價相當不俗，有傳拿玻里都心動。不過，阿布最終都冇出手，反而繼續信「超級水貨」費蘭度托利斯，事實證明阿布決定完全錯誤，費托狀態持續不振，今場更好大機會被棄用，靠晒杜奧巴打江山。


反觀，卡雲尼及咸錫今仗勢必把握機會，好好「教訓」車仔證明身價。尤其係卡雲尼喺分組賽兩戰曼城總共射入三球，堪稱英超球隊剋星，今仗隨時再射爆車路士。