陸軍有個「俄國莫連奴」

猪拉多纳

21/02/2012


皇馬有名帥莫連奴，莫斯科中央陸軍一樣有，佢就係施盧斯基，因為施盧斯基對戰術運用相當有心得，而且對球隊每一個細節都極為關注，故俄羅斯媒體都叫佢做「俄國莫連奴」。對於呢個稱號，施盧斯基話冇乜所謂，基於今場對手係實力強橫嘅皇馬，估計施盧斯基會有特別戰術去抵禦敵人來犯。而施盧斯基表示，單靠戰術係冇法子阻擋皇馬，球員鬥志先至係今場關鍵。




-12℃考皇馬意志




至於皇馬方面，球隊已經飛抵莫斯科準備賽事，當地氣溫只有攝氏負十二度，對於球員可謂一次大考驗，皇馬教練莫連奴就話冇人鍾意喺惡劣環境下比賽，所以球員要以意志力去克服一切。




提到莫連奴，最近國際米蘭及車路士球迷都好掛住佢，希望「寸王」可以離開皇馬打救佢哋，惟兩間球會暫時未為此事發表任何意見。查實每次莫連奴贏完歐聯之後就會離隊，教波圖如是，教國米亦一樣。莫連奴被記者問及會否為皇馬贏得歐聯後就離開，佢就話離隊與贏得冠軍根本係兩回事，就算皇馬今季贏得西甲及歐聯，佢都唔輕言離開。