寸王去留唔關捧盃事

猪拉多纳

21/02/2012


10年！今個星期係皇馬主帥莫連奴領軍出戰歐聯嘅10周年紀念大日子。10年前初出茅廬嘅「寸王」帶領波圖出戰即以0:1不敵皇馬，如今佢就做咗「銀河艦隊」嘅主帥，成為球壇頂尖領隊。展望將來，「寸王」話明佢今季去留絕對唔會受到攞唔攞到任何冠軍影響。


西甲領放成績史上次佳


「寸王」喺過去10年間先後帶領過波圖、車路士、國米同皇馬參戰歐聯，喺合共出戰嘅89場賽事中，取得48勝23和18負、入140球失71球成績，勝率高達54%，同時先後率領波圖同國米稱霸，成就絕對值得稱頌。




歐聯出色外，莫帥帶領嘅皇馬今季就連西甲亦得到突破，目前喺西甲遙遙領先，奪冠形勢大好，目前23輪攞到61分成績，已經超過哥迪奧拿嘅「夢3」任何一季成績，就只僅次60/61年球季嘅巴塞，為西甲史上次佳。對於有消息指佢會喺季尾贏完聯賽冠軍離隊，莫連奴就話：「冇錯，以前我離開波圖同國米都係贏得歐聯後走人，但其實離隊主要原因，只係我覺得係合適時候。」