拿玻里送車路士一程

猪拉多纳

21/02/2012
文： KIT

小妹同好多球迷一樣，細細個已經睇英格蘭足球雜誌，呢份熱情始終不變，難怪英超係香港最受歡迎嘅聯賽，不過，英超兵喺今屆歐聯就醜死怪，先有「雙曼」出局，阿仙奴上周就喺16強首回合吞AC米蘭4蛋！今晚到另一支倫敦球隊車路士登場，對住來自意大利嘅拿玻里，受讓平半都捧唔落手。（有線61、64、201、204及中央5台周三凌晨3:45直播）




雖然拿玻里喺今季聯賽和波多、勝率低，但勝在遇強愈強，今季喺聯賽對住頭3位嘅AC米蘭、祖雲達斯同烏甸尼斯，結果攞到2勝2和！佢哋喺歐聯就更搶鏡，分組賽主場技術擊倒英超一哥曼城，進攻鐵三角卡雲尼、拿維斯同咸錫嘅默契熟到爛，小妹實在拜服！睇番佢哋今屆喺分組賽主場共取得2勝1和，就連當時弗到爆嘅拜仁慕尼黑到訪都要失分，更何況係近況回落嘅車仔。


泰利膝傷都要頂硬上


車路士呢排可以話係屋漏偏逢連夜雨，踏入二月後竟然一場波都未贏過，兼且場場有失波，難怪有消息指領隊保亞斯或會冒險要膝頭有傷嘅泰利正選上陣！




不過無論搵邊個落場都好，車仔最大問題始終係領隊保亞斯，上場足總盃主場迎戰英冠嘅伯明翰，唔單止有主場球迷不斷大叫前主帥莫連奴個名，更有鏡頭影到杜奧巴喺下半場開波前，喺通道內扮大佬聚集隊員「訓話」，直頭將保亞斯架空。睇番分組賽成績，車仔作客3戰都贏唔到，家陣又面對住內憂外患，點計都係捧主隊穩陣。


橫數千軍


 拿玻里入波靠卡雲尼




‧近6次主場不敗，4次開細，近5戰亦有4場不失。

‧卡雲尼連續兩場有士哥，近18仗攻入16球。

 車路士近6戰5場開細

‧近6仗取得1勝4和1負，當中有5場開細。

‧射手費蘭度托利斯陷1,298分鐘入球荒。

KIT推介：拿玻里（上盤）