馬賽滅國有策

猪拉多纳

22/02/2012
文： Mic少

歐聯十六強首回合，馬賽主場對國際米蘭，球賽同行軍打仗一樣，主帥戰術部署及領導能力係勝負關鍵，雙方今場分野正係教練，兩軍今季同樣經歷過低潮，國米喺雲尼亞里執教下，表現並無起色，陷入信心危機。反觀馬賽教練迪甘斯力挽狂瀾，率領球隊走出困局，兩人教波功力高下立見，加上迪甘斯係「意甲通」，對國米瞭若指掌，可助馬賽先拔頭籌，主隊讓平半要上盤。（有線62及202台周四凌晨3時45分直播）




馬賽今季首五場聯賽不勝，一度令迪甘斯備受壓力，但佢沉着應戰，成功令球隊起死回生，包括聯賽及盃賽，近十五仗不敗，勝出率超過七成，可見迪甘斯教波極具功架。呢位四十三歲少帥球員時代曾經効力祖雲達斯多年，之後執教過祖記，對意大利球隊非常熟悉，相信已有滅「國」策略。


國米雲尼亞里等炒


國際米蘭教練雲尼亞里最叻係拯救細球會護級、爭升班，但教大球會完全唔掂，當年教車路士、祖雲達斯及羅馬，最終都係黯然離開，更被嘲諷為「二奶命」。佢今季中途臨急接掌國米，仍然宿命難逃，近期更衰到貼地，近六戰一和五負，其中五場冇波入，據聞老闆莫拉堤已準備將佢落鑊。




雲尼亞里無能兼前途成疑，球員隨時等睇戲，睇下佢幾時被炒，未必為佢賣命。而且國米中場史奈達有傷在身，可能先任後備，令球隊爭勝本錢進一步受削。




事實上，迪甘斯曾於03/04年度歐聯四強，以教練身份率領摩納哥，淘汰由雲尼亞里領軍嘅車路士，加上目前馬賽及國米表現各走極端，兩人再次交鋒，相信迪甘斯會再次成為贏家。