巴素利熟路唔赦拜仁

猪拉多纳

22/02/2012
文： 麥馬拿仁

歐聯十六強首回合，「神奇球隊」巴素利主場唔赦拜仁慕尼黑！巴軍遇強愈強，分組賽鬥曼聯一勝一和，教練禾高曾帶領拜仁各級青年軍九年，知己知彼下唔驚強敵；拜仁有舒韋恩史迪加倦勤，洛賓亦狀態低迷，今仗捧「讓球主勝」！（有線61及201台周四凌晨3時45分直播）




巴素利前領隊芬克去年十月離隊，副手禾高接手帶隊，頭十一場賽事八勝二和一負，其中包括四場歐聯賽事，最犀利一場當然係主場二比一殺敗曼聯。該仗巴素利毫不怯場，攻守徐疾有致，中場壓迫力極強，後防又極為穩健，一度領先到二比○並非幸至。禾帥曾於拜仁領導U10至U17多支球隊，現時拜仁唔少球星佢都教過，對舊會戰術、踢法簡直熟到爛，預料可想出破敵之法。另外，巴素利瑞士球星梳頓沙基利，於贏曼聯一仗光芒四射，下季將會轉會拜仁，佢講明唔會對新東家留手。


拜仁內憂外患讓唔起


拜仁本季初所向披靡，但長路有盡時，到2012年腳風轉差，六戰只得三勝二和一負戰績，早前作客漢堡打和都算，上仗去到包尾大幡弗賴堡地頭，竟然同對手互交白卷，狀態堅曳。中場發電機舒韋恩史迪加受傷缺陣，而洛賓亦狀態低迷，慘被教練軒歷基斯炮轟「自私」，球會飽受內憂外患，作客讓波兇險。