曼城出副選夠贏「波」添食

猪拉多纳

22/02/2012
文： 朱楓

歐霸盃32強次回合今晚上演獨腳戲，由英超曼城主場對葡萄牙勁旅波圖。曼城首回合作客照贏2:1，證明雙方實力有分野，今晚返番無敵主場，就算出副選都夠殺，讓半一上盤有買趁早呀！（有線61、64、201及204周四凌晨1:00直播）




首回合曼城作客波圖雖然落後在先，但最後仍然憑強橫後勁反勝2:1，完全係卡士嘅表現。老實講，以目前曼城嘅班底，降格踢歐霸盃根本係虎入羊群。




由於首回合有兩個作客入波，今仗就算輸0:1都出線，朱楓預期曼城今仗會派唔少副選上陣，但迪斯高同占士米拿呢啲二線兵一樣係國腳級，實力仍然係超晒班，唔好唔記得托尼兄弟都已經從非國盃歸隊，加上曼城喺歐洲賽主場一向有保證，近15場未輸過獲12勝3和，再贏波圖有幾難？


波圖防線唔齊腳


波圖今季明顯跌watt，喺歐聯被尼科西亞同辛尼特擯出局，降格歐霸盃再輸埋畀曼城，錄得今季主場首敗。雖然波圖今仗有後衞奧達文迪坐完波監，可惜輪到左閘艾華路佩雷拉停賽，加上右閘丹尼路雷斯又因膝傷極大機會缺陣，上個月買入嘅射手真高又唔符合出賽資格，要破史上14次作客英球會未嘗一勝、得2和12負嘅宿命，睇怕要等多1年。




首回合：曼城客勝2:1