利華打吡戰強勢復仇

猪拉多纳

25/02/2012
文： 蘇斯黑柴

德甲頭輪直播上演萊茵河打吡，科隆主場鬥利華古遜，科隆近兩次對賽都贏波，但呢班波歇冬後明顯散晒，今仗仲有逾半隊主力缺陣，實力大打折扣，黑柴深信利華有力大報復，推介1.78倍客Ｗ。（有線61及64台周六晚10時30分直播）




科隆近兩次對利華都有上佳表現，上季主場淨勝兩粒，今季首循環作客仲爆冷贏到四個一皮，不過到咗今日形勢大逆轉，科隆歇冬後成隊波走晒樣，踢五場輸四場，唯一勝仗係面對上半場已踢少個嘅弱旅凱沙羅頓，表現極唔對辦，而且傷停問題極之嚴重，除咗有守將謝姆、軒歷基沙蘭奴、中場畢治文、阿曼度比堤、比桑尼、鋒將捷希同烏夫七件傷兵，守將碧高同中場柏斯高雙雙停賽，後防大將柏度基洛美本周操練受傷狀態成疑，「王子」普多斯基亦啱啱傷愈未弗要先任後備，陣容天殘地缺，戰鬥力進一步削弱。


新隊長卡斯特羅好腳頭


相反，利華古遜歇冬後只係輸過畀榜首多蒙特同「地上最強」巴塞隆拿，歐聯瀕臨出局反而可以更專注本土聯賽，上仗大炒奧格斯堡亦令少帥杜特威信提升，中場大將連拿度奧古士圖上仗復任正選固然幫助大，而歇冬期由熱刺加盟嘅哥魯卡擔任右閘，亦可以解放客串右閘嘅卡斯特羅，等佢推上中場加強攻力，上仗杜特首次將隊長臂章交畀佢，即刻有出色表現仲入埋波，以利華古遜目前人腳同氣勢，今場打吡戰即使作客亦有足夠信心贏波復仇。