意甲榜首戰祖記抵玩

猪拉多纳

25/02/2012
文： 巨高

兩支意甲爭標主角，AC米蘭及祖雲達斯周日凌晨正面對撼！今場賽果對於聯賽冠軍起關鍵作用，巨高首先向大家交代軍情，佔主場之利嘅AC有首席射手伊巴謙莫域上訴被駁回，今場無法倒戈鬥祖記。另外中場奇雲保定仍未康復，位置或由艾沙拉維頂上。今場AC殘陣出擊，就算有主場都讓唔起「斑馬兵團」，祖記受讓平半相當抵玩，捧下盤穩陣！（中央5台周日凌晨3時45分直播）




睇番意甲榜首形勢，AC領先祖記一分排榜首，但AC多踢一場，形勢甚緊湊，冠軍亦必由兩支班霸爭奪，第三及四位只係烏甸尼斯、拉素，落後榜首八分之外，孭噴筒都難追。




AC今季已曾喺主場輸過畀祖記，當時為意大利盃，AC輸一比二。或者你會話AC一向唔吼盃仔，主場輸畀「斑馬兵團」都冇相干。但唔好忘記，AC向來都視祖雲達斯為主要競爭對象，盃賽之失難免會對AC球員構成心理影響。




再加上「紅黑兵團」今場大戰有多名主力唔出得邊有本錢讓波，所以巨高希望大家唔好憧憬AC可以踢番出大炒阿仙奴四比○嘅水準。


祖記抖夠出戰


「斑馬兵團」今季聯賽仍未嘗敗績，AC要打破呢個咁堅嘅數據並唔容易。況且祖記唔使應付歐洲賽，球員有足夠休息作準備，體力一定好過AC。再講，今季係「生招牌」迪比亞路効力球隊最後一季，佢都好希望以隊長身份再次為祖雲達斯高舉聯賽獎盃，為其職業生涯畫上完美句號。




故此無論祖記高層、球迷、教練干地及隊友都希望迪比亞路可以美夢成真。正所謂齊心就事成，今晚祖雲達斯將會付出所有，務求喺聖西路球場砌低AC，為聯賽冠軍打穩陣腳。