曼聯撚雀 賀傑斯上陣900場

猪拉多纳

26/02/2012
文： 蘇豪

英超二哥曼聯今輪作客「金絲霍」諾域治，「紅魔鬼」日前於歐霸盃輸得肉酸，主帥費格遜今場勢必精銳盡出，加上老將傑斯有機會第900次為球隊上陣，球員爭勝決心特別強，熱捧客勝！（有線201及301台周日晚9時30分直播）




曼聯上仗於歐霸盃主場對阿積士輸波晉級，主帥費格遜有膊頭，賽後罕有認衰，今場決心挽回面子。射手朗尼之前喉痛休戰，今場應可復出，韋碧克、卡域克及里奧費迪南等骨幹成員亦可復任正選。另外，老將傑斯已為球隊上陣899次，今次有機會第900次披甲，必定想贏波慶祝。




「紅魔鬼」目前仍有唔少傷兵，十字軍名單包括中堅尼曼查維迪、中場路爾斯華倫西亞、路爾斯安達臣、費查及奧雲等，另一中場湯卡華利又整親足踝，同樣無緣上陣。曼聯傷兵雖多，但勝在後備力量強勁，影響唔算好大，為免畀榜首球隊曼城進一步拋離，今場作客絕對唔會手軟。


吼「半場勝」搞掂諾域治


升班馬諾域治演出硬淨，現時於聯賽企穩中游，不過大軍今季主場對阿仙奴及熱刺等實力分子都輸波，反映「金絲雀」仲未夠班，對住曼聯肯定仲難踢。「紅魔鬼」贏面高，今場捧客勝穩陣，另外球隊今季聯賽作客贏八場，其中七仗取得半場領先，可兼顧「半場客勝」！