布拉加打吡戰玩入球細啱數

猪拉多纳

27/02/2012
文： 朱楓

今晚葡超爆發布拉加區打吡，由布拉加主場對甘馬雷斯，雙方每年都以爭歐洲賽資格及贏對方為目標，可想而知呢場來回6分波對雙方有幾重要。計實力，布拉加本來應該秤先，可惜今場受傷兵同被抽走所有國腳，陣容天殘地缺，對住「1:0」專家甘馬雷斯，似乎捧1.7倍入球細先正路！（開賽時間：周二凌晨4:15直播）


吼埋甘馬雷斯贏1:0


布拉加近年進步神速，上屆成為歐霸盃亞軍，可惜今屆就欠啲運，啱啱喺32強出局不特止，隊長兼射手阿倫同後衞紐奴高爾浩喺賽後驗出有傷，今晚聯同前鋒莫索羅、中場路爾斯阿拔圖同後衞艾華頓荷西等長期傷兵一齊缺陣已夠大鑊，點知老牌射手紐奴高美斯、中場維亞拿、古斯杜迪奧、魯賓艾摩廉同門將基姆施華5大主力，仲喺呢個時候全部被葡萄牙國家隊抽走，準備對波蘭嘅熱身賽，搞到今晚要搵大量副選溝埋o靚仔應戰。




綽號「白軍」嘅甘馬雷斯，今季簽得前熱刺中場柏度文迪斯後實力大增，近況仲要好恐怖，上場缺少柏度文迪斯等4名主力，喺主場竟然照樣砌底目前葡超「一哥」賓菲加，錄得連續3場聯賽贏1:0，真係唔講得笑。睇番往績，原來甘馬雷斯近5場聯賽勝仗，有4仗都贏1:0，睇得出呢隊波好識踢穩守突擊戰術，今晚作客布拉加，玩個細之餘，真係不妨追埋呢個波膽！