希杭守「細」波抗巴塞

猪拉多纳

03/03/2012
文： 翁文成

翁文成不嬲都唔會盲目追捧名牌，好似今晚場西甲咁，巴塞隆拿首席「士哥拿」美斯要坐波監，嚟緊周中又要出戰歐聯喎，相信脫胎換骨嘅希杭去到魯營就算頂唔住，都唔會輸得太肉酸，信埋雙方交手狂開細嘅攤路，呢場波一於博1.95倍細。（now632台周日凌晨3:00直播）


美斯停賽 哥帥轉攻歐聯


巴塞喺西甲落後緊畀榜首嘅皇馬10分，連教練哥迪奧拿都親口承認扯白旗，落重彈藥攻歐聯仲實際，今鋪勒住留力下周中對利華古遜場波一啲都唔奇。除咗艾比度臀部受傷抖10日之外，美斯亦因為累積5面黃牌要坐波監，呢位巴塞「球王」今季喺西甲喪入28球，冇佢又冇養緊傷嘅韋拿都咪話唔濕滯！只靠法比加斯一個喺前面搵食，火力有限。




計牌面希杭當然冇得同巴塞比，之不過佢哋家陣深陷降班漩渦，班球員肯定會加多兩錢肉緊，戰意比起巴塞鮮明得多。況且自從新帥基文迪接掌之後，希杭已經連和馬體會同桑坦德，表現明顯Sharp醒咗，賽前佢老人家仲話唔貪心，去到魯營攞1分就當完成任務，預期一眾戰將實會屯重兵抵擋巴塞嘅來犯。睇埋攤路，雙方近5次交手全部開細，今戰大細中位數係3.5球，咁好路冇理由唔追吖！