曼城弗爆 客窒士砵亭

猪拉多纳

08/03/2012
文： 麥馬拿仁

英超「一哥」曼城作客葡超士砵亭，曼城意外跌落歐霸賽區，雖然呢隻盃仔對列強唔算太吸引，但曼城屬「新紮班霸」，仍極需捧盃證明自己。球隊早前於聯賽盃、足總盃先後出局，現只有英超同歐霸可以爭，故必力爭成「歐洲雙冠王」。




睇番曼城上圈作客波圖陣容，前線以巴洛迪利、大衞施華同拿斯尼攻堅，後防赫特、隊長高柏尼都在陣，反映球隊絕冇揸流攤，最終於半場落後一粒下反勝二比一，曼城對歐霸可謂有心有力。陣中幾大殺手阿古路、迪斯高等全部托弗，其中大衞施華愈踢愈有，無論於球會抑或西班牙國家隊都虎虎生威，連巴洛迪利都生性連續兩仗入波，無論領隊文仙尼點樣排陣，要贏士砵亭易如反掌。


士砵亭冇厘火氣


士砵亭縱屬葡超三強之一，但戰鬥力與波圖、賓菲加相去甚遠。主力射手雲禾夫斯雲高已六仗忘帶射門鞋，而佢哋小組入滲踢法同波圖甚為相似，連波圖都輸得咁慘，士砵亭又點會有運行？