繼續Sell碧咸

猪拉多纳

08/03/2012
文： 巨高

全新一季美職將於香港時間周日早上開鑼，衞冕總冠軍洛杉磯銀河當然成為大眾焦點。始終佢哋有「萬人迷」碧咸壓陣，叫座力永遠喺度。喺新球季碧咸將會聯同當路雲及羅比堅尼等星級隊友，再為洛杉磯銀河爭取衞冕總冠軍，打造「銀河盛世」。


年紀大星味更濃


大家都知碧咸已經成36歲，球員生涯臨近尾聲，真係踢一場就少一場。依家睇碧咸踢波愈來愈珍貴，碧咸迷當然要追隨到底啦！話碧咸係天生明星真係一啲都冇錯。無論佢効力曼聯、皇馬、洛杉磯銀河甚至客串AC米蘭，一舉手一投足受到廣泛關注，超然地位可謂無人能及。而喺足球沙漠美國，碧咸就更顯得光芒四射，其亮度或比佢喺歐洲踢波時有過之而無不及。




隨着年齡不斷增長，碧咸喺場上嘅活力的確減退。不過球迷唔會在乎。最重要係碧咸仲企喺綠茵場上，已令球迷興奮足三日三夜。




近年有唔少球星都會去到北美搵食，羅比堅尼、亨利同馬基斯等，現時已成為美職嘅孭飛球星，而盛傳一啲年紀漸長嘅歐洲球星，都有意喺職業生涯末段加盟美職搵美金。


開荒牛居功至偉


事實上，如果冇碧咸呢隻「開荒牛」，今日未必會有咁多球星肯去美職作賽。好多人都覺得洛杉磯銀河嘅成功係來自碧咸，但查實美職先至係真正大贏家。問心嗰句，如果冇碧咸嘅話，你會留意美職嗎？所以講到新一季美職嘅最大賣點，冇得傾，繼續係碧咸玩晒！