法林明高殘陣「克」到痹！

猪拉多纳

08/03/2012
文： 亨格比利

聽朝續有自由盃玩，B組嘅巴甲法林明高喺主場恭候厄瓜多爾嘅艾美歷克。計牌面梗係擁有朗拿甸奴嘅法林明高秤先，但呢支巴甲班霸傷兵滿營，新帥辛坦拿又話未摸熟班波，讓波似乎有暗湧喎！（開賽時間：周五早上6:30）


艾美歷克搶攻贏鬥心


63歲名教頭辛坦拿上月重掌法林明高帥印，領軍7戰得4勝1和2負，睇落好似唔曳，但當中喺州聯對住馬杜雷拿、杜基卡斯亞斯呢啲二打六都係小勝，表現冇霸氣，辛坦拿歸咎於陣營傷兵太多。門將雷斯菲臘比上仗撼親個頭入廠，醫生建議佢休戰1個禮拜，將聯同一對中場韋利安斯杜明高斯同卡路士連拿度齊齊做座上客，加上球隊下周初要喺州聯硬撼富明尼斯，今場波充滿隱憂。




另邊廂嘅艾美歷克，喺首輪分組賽小勝奧林比亞會，教練費列達斯深知班手足有幾多料，但賽前記者會就講明唔會死守，仲會搶攻同主隊鍊過，鬥心十足對住天殘地缺嘅法林明高隨時偷到雞，2.8倍「讓球客勝」絕對抵玩。