曼城超班「大」開殺戒

猪拉多纳

08/03/2012
文： 查理阿蛋

「藍月亮」曼城要喺歐霸盃闖一番事業嘅決心，由32強大炒波圖嘅氣勢已經睇得出，嚟到16強對住主場表現極佳嘅士砵亭，曼城就算保唔住清白，但憑佢哋一班質素及狀態都處於巔峰嘅中前場球員，要入波應該唔難，一於捧1.95倍入球大啦！（有線61及201周五凌晨2:00直播）




曼城今季喺歐聯雖然不幸高分出局跌落歐霸，但輸咗間廠，都好明顯想贏番粒糖，近排更踢出前所未有嘅氣勢，最近6戰全勝僅失1球，喺歐霸更加以兩回合計6:1擊敗衞冕冠軍波圖，風頭一時無兩，而且上場對保頓更收起部分主力，明顯係要喺歐霸去到盡，捧得嘅盃都要捧！今仗有機會復任正選嘅高路托尼更揚言要同細佬一齊贏冠軍，仲話同班隊友會當每場都係決賽咁踢，明顯戰意十足喎！


阿古路 施華養精蓄銳


不過有一點要留意嘅係，曼城班後防一離開自己地頭就間唔中發波瘟，近8次作客有5場都有失球，尤其係今仗對手士砵亭主場有番咁上下威力，就算星級箭頭雲禾夫斯雲高有傷唔出得，伊斯米洛夫同馬迪亞斯費南迪斯把握力亦唔弱，門將赫特未必可以保住清白之身。




雖然中場耶耶托尼停賽，但好彩嘅係「藍月亮」前鋒線質素超晒班，阿古路同大衞施華今場抖夠復出一定弗到漏，曼城喺32強對住波圖所入嘅6球入面，就有3球係由佢哋兩個包辦，小妹就唔多睇好士砵亭可以頂得住曼城呢陣狂「鋒」喇，曼城入番2、3球贏波同士砵亭齊齊開番個「大」騷，應該冇甩拖。


橫數千軍


士砵亭最怕阿古路




‧近9次主場歐洲賽得8勝1和。

‧09年歐霸盃曾被當時効力馬體會嘅阿古路入2粒淘汰。

曼城近6戰全勝

‧近6場全部獲勝，僅失1球。

‧阿根廷射手阿古路近6仗攻入4球。