焦點新星

猪拉多纳

09/03/2012




原口元氣


速度快、技術全面，傳射能力俱佳，能夠勝任翼鋒及正前鋒，除咗係日本奧運球隊成員之外，更已進身大國腳行列。浦和紅鑽今季大搞，請來前廣島三箭名帥柏高域執教，原口元氣踢法最啱佢嘅戰術，可進一步發揮呢位新星嘅潛能。


酒井宏樹


被譽為日本新一代超級翼衞，渾身是勁，助攻力強，於邊路跑上跑落，加上擁有不俗腳法，可憑個人技術突破對手防線。佢喺上年年尾舉行嘅世冠盃，演出光芒四射，據悉已獲史特加等多支歐洲球隊垂青，有望成為長友佑都新接班人。


大迫勇也


日本奧運隊主力，以埋門把握力強見稱，典型禁區殺手，上季聯賽多數屈居後備，但仍然有5球進帳，表現備受好評。由於首席射手田代有三離隊，預料「怪物」大迫勇也勢必得到重用，坐正箭頭位置，將會有更多機會表演精湛射術。


清武弘嗣


同前輩香川真司一樣，屬於天才橫溢嘅中場指揮官，閱讀球賽能力超卓，而且擁有上乘射術，上季聯賽入咗7球。櫻花兩位中場球星香川真司及乾貴士近年先後去德國搵食，一般預料清武弘嗣將成為另一位櫻花外流戰將，前途無可限量。