曼市FIGHT CLUB

猪拉多纳

11/03/2012
文： 蘇豪

曼市搏擊會（Fight Club）今晚繼續上演！兩支曼市球隊曼城及曼聯，今季一直在聯賽榜你一拳我一腳，鬥到難分難解日月無光，連於歐霸盃輸波，亦都約埋一齊。曼城於歐霸盃不敵士砵亭後，今晚英超作客巨人殺手史雲斯（有線201及301台周日晚10時直播）；至於曼聯輸畀畢爾包後，則於奧脫福擺擂台迎戰中游隊伍西布朗（有線200及300台周日晚10時直播）。兩軍目前於積分榜上只有兩分差距，無論最終由邊隊攞冠軍，In "soccer" we trust！

迎西布朗鬥攻 曼聯大動干戈

英超二哥曼聯今輪主場對西布朗，「紅魔鬼」於歐霸盃羞家輸波，防線再現低級錯誤，返到聯賽不容再失，實會狂攻爭勝。西布朗近三戰入十粒，射手奧丹維治獨建五功弗到漏油，有力再添士哥，兩隊鬥入波，捧大盤穩陣！


曼聯上場歐霸盃主場對畢爾包全場捱打，如非門將迪基亞上身連番撲救，點止失三粒！其實「紅魔鬼」兩閘近期都有問題，左閘老大哥艾拉助攻力強，但經常返唔切回防，右閘拉菲爾達施華上場發夢唔追波累球隊輸第三球，但無論用拉菲爾達施華、菲爾鍾斯定基斯史摩寧，始終都唔夠穩，成條防線只得里奧費迪南較為可靠。


西布朗連續三場聯賽贏波，合共轟入十球，包括大數狼隊同新特蘭，狼隊出名防守曳，大敗唔奇，但新特蘭於奧尼爾領軍下向來表現硬淨，西布朗對住佢哋能夠淨勝四球，可見大軍火力有幾勁。西布朗能夠全面爆發，主要因為射手奧丹維治踢到上晒身，此子近三場貢獻五球，成功撐起前線，作客曼聯未驚過！