|
|
14/03/2012
文： 渡邊年
身邊唔少人都話，文仙尼係庸帥，雖然依家曼城喺英超保持爭霸機會，但冇改變佢哋嘅睇法，喺呢班人心目中，從技術層面分析，文仙尼唔識用人、排陣又曳，不過，渡邊年就有唔同睇法，文仙尼唔係庸人，而係容人，極有「容人之量」嘅人，呢啲人喺職場上永遠都會成功嘅。
你諗吓喇，畀你對住巴洛迪利咁嘅下屬，所有你諗唔到嘅古靈精怪嘢全部做齊，不論球場內外都係，畀我，唔激到嘔血呀？但係文仙尼就真係好嘢，唔只忍到呢件「腦殘」，仲要係重用佢，事實證明文帥嘅決定冇錯，巴洛迪利、迪斯高同阿古路可以輪流發威，喺聯賽長途戰好重要。
「腦殘」「泰仔」唔易忍
另一個例子係泰維斯，呢單鬧劇搞足幾個月，依家呢？泰維斯返番預備組踢波囉。咪睇件事好似順理成章，其實文仙尼都幾忍辱負重，畀球員落面，仲要喺傳媒面前講佢壞話，但一樣可以畀「泰仔」返嚟。
點解咁做？拿，依家英超形勢緊湊，曼城畀曼聯過咗頭，聯賽去到決定性階段，連中場大衞施華都話，場場都係似盃賽決賽咁，因為只要其中一場失分，成個形勢都唔同晒。泰維斯只要操番弗，隨時成為文仙尼一個秘密殺着，尤其四月底嗰場曼市打吡，賽果對聯賽冠軍有決定性作用，到時如果泰維斯入波，更加成為經典中經典。
只要曼城今季壓倒同市宿敵曼聯奪冠，就可以取得自1968年以來首個頂級聯賽冠軍，到時文仙尼成為球會英雄，名字寫入球會史冊，同巴洛迪利及泰維斯呢啲激氣嘢相比，算得係咩吖！
|
|
金睛卡
发表于 2012-3-14 07:17
变色卡
显身卡
发表于 2012-3-14 10:59
