「熱」捧羅馬讓球主勝

猪拉多纳

19/03/2012
文： 查理阿蛋

嚟到季尾直路衝刺，安歷基嘅「新羅馬帝國」復興雖然唔算成功，但係總算見到一班新人發揮得愈嚟愈好，今晚喺意甲主場鬥作客戰績極差嘅熱拿亞，就算「王子」托迪因傷缺陣都足夠應付有餘，2.22倍「讓主」絕對捧得過。（開賽時間：周二凌晨3:45）


安歷基話羅馬慢慢進步緊，某程度上小妹都同意嘅，起碼上場贏咗巴勒莫，終止作客5場不勝兼場場失波嘅走勢，至於主場1:2僅負拉素，都係因為球證過嚴畀咗面紅牌史基倫堡，先搞到自2011年11月以嚟保持嘅主場不敗紀錄被打破，其實羅馬喺主場依然相當可靠架！撞啱熱拿亞近7場作客得6負1和，羅馬搵佢哋出番輸畀拉素啖冤屈氣就啱晒。

熱拿亞作客曳傷兵成籮

「雌狼」今場有「老王子」托迪同埋比真歷兩位射手有傷唔出得，本來小妹至愛嘅保贊大有機會擔正，點知另一小將波連尼踏入2012年後突然大爆發，最近8場勁入7球，「小王子」都惟有行埋一邊啦！加埋中場核心迪羅斯傷愈復出，有佢負責派牌，又使乜驚讓唔起熱拿亞先？


熱拿亞如果繼續頹落去，分分鐘跌落降班區，佢哋今場仲有干斯坦、古卡、格蘭基斯、保禾及斯古利等要員有傷唔出得，教練馬連奴都無奈嘆息：「我哋真係勁唔好彩，好似干斯坦無啦啦喺草地上面跣一跣就要抖成個月，都唔知點搞！」咁大籮傷兵，想發圍都幾難喇！