阿仙奴勢銳追大盤

猪拉多纳

24/03/2012
文： 張志德

細鬼球員出身，當然熱愛本地球圈，眼見近年香港球壇愈搞愈好，多支球隊衝出亞洲都有唔錯成績，真係非常安慰。另外，地區化意念亦非常好，大埔、屯門、深水埗雖然成績唔算好突出，但佢哋球迷好團結，熱烈打氣下令現場氣氛比以往熾熱。


外地球圈可以愈搞愈有規模，同各支球隊都有深厚球迷層有關，大城市數支球隊各有各擁躉，大家關係勢成水火、互相憎恨，好似倫敦兩隊星級球隊阿仙奴同熱刺，敵對程度非同小可，想當年蘇甘保由熱刺轉投兵工廠，就一度引起軒然大波，蘇甘保甚至收到死亡威脅。雖然係咁，但地區化有助凝聚球迷，點都係好事。

對維拉往績多波入

熱刺今季排名長期高過死敵，不過風水輪流轉，兵工廠聯賽六連勝，已反壓熱刺上到第三位，依家球隊士氣如虹，尹佩斯成功擺脫傷患，狀態愈來愈弗，上場贏大勇愛華頓連運都有埋，今晚主場迎戰阿士東維拉贏波冇難度。不過齋Ｗ得1.25倍冇肉食，計往績近四對賽都開大，今仗捧大最好。（有線201及301台周六晚11時直播）