皇馬莫連奴逆境自強

猪拉多纳

24/03/2012
文： 山度士

做人主帥甚艱難，尤其係當大球會嘅領隊，稍一失準立即被各方圍剿，前有車仔領隊保亞斯，後有佢師傅莫連奴。


剛戰被維拉利爾逼和，皇馬有兩人場上領紅，莫連奴只講咗一句：「乜你哋睇唔到咩？」暗示畀球證針對。點知皇馬的喉舌《馬卡報》就話，沙治奧拉莫斯同奧斯爾「染紅」係罪有應得，連自己人都唔幫，搞到莫帥冇晒癮。


雖然今仗對蘇斯達有比比、沙治奧拉莫斯同奧斯爾停賽，或對防線及中場創造力有影響，不過，莫連奴份人愈挫愈強，這種精神亦潛移默化感染了球隊，現時嘅皇馬或許不像以前咁優雅，但佢哋鬥志十足，加上莫帥擅於激勵士氣，即使今場莫帥要停賽，都無礙球隊爭霸心。

鬥蘇斯達又係入球騷

皇馬亦算好彩，今仗遇上出名作客曳嘅皇家蘇斯達，若C朗、卡卡、希古恩、賓施馬四箭齊發，相信蘇斯達都幾難擋得住。依家皇馬只領先巴塞六分，個聯賽冠軍唔係咁十拿九穩，加上周中唔使踢歐聯，今仗冇後顧之憂下可盡情大炒，但鑑於佢哋後防多傷停，蘇斯達嘅反擊亦好銳利，預料呢場會係入球騷。（now 632周日凌晨3時直播）