修咸頓勒唔住追殺唐軍

猪拉多纳

24/03/2012
文： ComboKing

今晚十一場英冠，大勇修咸頓主場鬥唐卡士打有望大炒。「聖人」季尾重拾霸氣，近七場聯賽贏六場大勝頻頻，簡直超晒班勒都勒唔住。唐軍有勇無謀，近三場聯賽只攞一分，班波洩晒氣後防穿晒窿，主隊一個列基林拔都可搞掂對手，捧讓球主勝。（周六晚11時開賽）

唐卡士打士氣差

修咸頓本季演出可圈可點，除季中經歷小低潮，其餘時間都有超水準發揮，長期位處前列並非僥倖。球隊季尾大爆發，當然要多得前鋒列基林拔着火，佢近六戰瘋狂轟入八球，其中兩場仲要大演帽子戲法，再加上「得分後衞」凱維特都大勇，連續兩場作客都贏波後，今戰回歸主場，勢必大開殺戒。唐卡士打得迪奧夫、比基安尼加盟後，恃住攻力增強大打開放足球，但近三場聯賽只得一分，士氣蕩然無存下，主隊可予取予攜。


米禾爾近期轉打進攻足球，攻擊手如達路斯軒達臣腳風順，已連續七場開大，今晚主場對列斯聯，客軍剛被森林大炒谷到成肚火，今仗對攻下易開大。睇埋屈福特主場鬥葉士域治，雙方位列中游打緊風流波，會繼續喪攻，一樣揀大。