車仔熱刺2D「大」激鬥

猪拉多纳

24/03/2012
文： 阿占

英超前4激鬥，好睇過戲！車路士同熱刺喺周中齊齊失分，兩軍今晚會喺史丹福橋球場交手合演倫敦打吡，正面爭奪歐聯入場券！老實講，車仔換帥後脫胎換骨，熱刺實力亦唔弱，名副其實半斤八両，不過兩軍箭頭杜奧巴（Drogba）及迪科爾（Defoe）今鋪難得擔正，2D肯定會搏命騷哥利，玩1.7倍入球大最划算！（有線200及300周六晚8:45直播）


教波有時好講魅力，小弟唔認為保亞斯嘅領軍能力，會差得過助教迪馬堤奧，之但係偏偏喺保亞斯被炒後，車路士成績真係立即反彈，好明顯，班車仔大帝係要逼走保帥先肯生性踢好波囉！

藍戰士4星齊翻生

車仔換帥後先後喺歐聯同足總盃晉級，雖然周中英超快車作客不敵曼城，不過霉咗大半年嘅「費托」翻生，繼足總盃8強梅開二度後，周中表現亦惹人好感，原本係必然正選嘅杜奧巴突然變咗閒人，呢啖氣當然吞唔落啦，賽前有消息指迪馬堤奧今場會用番「魔獸」擔正，睇怕杜奧巴都要加多兩錢肉緊爭士哥先得喇。


除咗費托同杜奧巴，另外兩老泰利同林柏特亦齊齊回勇，當中隊長泰利更及時傷愈，今戰隨時候命。另一攻擊好手桑馬達又一直Keep住有高水準演出，鋒力夠晒保證。不過車仔有一點令小弟勁擔心，就係佢哋要同時兼顧英超、足總盃同歐聯三路戰線，始終班主將年紀唔細，今場係咪一定贏到熱刺？真係好難講囉。

熱刺遇強例開大

熱刺喺周中僅僅逼和史篤城，要力保前4已不容再失。雖然佢哋條防線近期錯漏百出，但勝在進攻嗰班個個當「弗」，尤其係之前失寵嘅迪科爾腳風轉順，有佢配合雲達華治同加里夫巴利，唔慌冇波入。翻查數據，熱刺今季作客勁旅如曼聯、阿仙奴同曼城都開晒入球大，今場照行呢條路就冇衰啦！

橫數千軍

 車仔近8戰5勝

‧近8戰5勝3負，對上7戰半場未試過落後。

‧聯賽主場開大比率達79%，排英超第3。

 熱刺對賽輸蝕

‧近8戰2勝3和3負，連續5場有失波。

‧近6次作客車路士未嘗1勝，得2和4負。

頂占筍盤：車路士（入球大）

有線球彩台主持阿占

電郵：soccer64@cabletv.com.hk

PHONE波熱線：1831 678 「超級星期六」開放時間：周六晚10:00至凌晨3:30