史篤城唔怕藍月亮

猪拉多纳

24/03/2012
文： 郭球奇

救得1次，未必救到第2次！「野獸」泰維斯日前終於復出，仲交出靚助攻做贏波功臣，但今晚曼城喺英超作客史篤城，就未必可以再做英雄，事關史篤城專喺主場打老虎，近年對住「藍月亮」都唔使輸，受讓唔難開出2.2倍「讓球主勝」！（有線200及300、廣東體育周日凌晨1:30直播）


曼城日前終於做番齣好戲，主場以2:1反勝車路士，雪咗超過半年嘅泰維斯，一復出仲立即交出絕殺助攻，賽後被隊友同傳媒捧到天上有地下無，認為佢係曼城爭標路上其中一隻重要棋子。

曼城近8場聯賽作客僅2勝

雖然曼城鋒線人腳濟濟，不過防線近排就唔多畀到人信心，領隊文仙尼都承認近排戰績倒退，同一對正選中堅齊齊受傷有好大關係。雖然早前喺歐霸盃整傷腿筋嘅高柏尼已經無乜大礙，今晚應該可以復出，但尼史葛就仲未得，隱憂仍然存在，至弊係曼城近期客戰成日走樣，近8場英超作客只得2勝2和4負，對於一隊爭標分子嚟講實在唔合格。

史篤城上仗幾乎搞掂熱刺

對家史篤城近排係就係3場不勝，但作客其實只係僅負車路士同利物浦，日前去到熱刺地頭更幾乎贏埋，今晚返到主場隨時有驚喜。事實上，球奇賽前check番賽績，發現史篤城今季喺不列坦尼亞球場對住強隊特別醒神，首循環和過曼聯同車路士，仲贏過熱刺同利物浦，近4次主場對曼城更加未輸過（見下表），韌力極之驚人，即使前鋒富拿仍然要停賽，都有力又令曼城出醜，幫紅魔打江山！

橫數千軍

 史篤城主場7成唔輸


‧聯賽主場6勝4和4負，不敗率達72%。

‧近8戰有7場開細。

 曼城近期作客頻失準

‧近8場聯賽作客得2勝2和4負，有4場食白果。

‧連續4場都係先失波。

史篤城近4次主場迎曼城不敗

日期 戰果

10/11/27 史篤城 1:1 曼　城

10/02/25 史篤城 1:1 曼　城

日期 戰果

10/02/16 史篤城 1:1 曼　城

09/01/31 史篤城 1:0 曼　城