馬體會發「威」演入球騷

猪拉多纳

29/03/2012
文： 亨格比利

歐霸盃今晚連場激戰，當中嚟自西甲嘅馬德里體育會就會喺8強首回合主場同德甲球隊漢諾威展開廝殺。馬體會呢排戰績回落，不過教練施蒙尼賽前收到好消息，就係一對中場拍檔迪亞高同堤亞高文迪斯齊齊傷愈，前線嘅法卡奧肯定唔愁冇供應，對住又係攻強過守嘅漢諾威，1.68倍入球大趁熱食。（有線62及202周五凌晨3：05直播）


自從施蒙尼去年底上任之後，呢位阿根廷名將教到馬體會曉飛，不過最近3場西甲就輸咗2場，上仗輸畀包艇嘅薩拉戈薩之後，爭取來屆歐聯入場券嘅任務大受打擊。對於近況回落，施蒙尼牙痛咁聲，猛咁呻馬體會後備兵源不足，會方亦都承諾會喺夏天開水喉，目前惟有限米煮限飯。


據西班牙《馬卡報》消息，一對中場迪亞高同堤亞高文迪斯已喺前日復操，哥倫比亞射手法卡奧今季如魚得水，好大原因係受惠於迪亞高啲靚助攻，睇嚟呢對攻擊組合今晚勢必成為漢諾威後防心腹大患。

漢諾威攻強守弱

漢諾威呢邊，歐洲賽經驗就肯定冇馬體會咁豐富，但教頭史隆卡就曾經喺05至06球季帶領史浩克殺入歐協盃（歐霸盃前身）4強，有佢老人家揸旗，照計漢諾威就算作客都唔會太失禮。考慮到陣中一對鋒將舒拿達夫同耶高蘭最近打破入球荒，另一前鋒蘇拜治亦都刑滿復出，要撕破有守將安東尼奧盧比斯同施維奧文奴倦勤嘅馬體會防線唔難吖，今仗入波唔慌少。