祖記爭標唔放過「里」

猪拉多纳

01/04/2012
文： 鄭少偉

勞工處近年有句宣傳片口號叫「不論年齡，惟才是用」，亨利聽完後相當認同。祖雲達斯老將迪比亞路雖然年屆37歲，但呢位意大利長青樹連續兩場上陣都有「士哥」，今晚祖記主場迎戰近況開始回落嘅拿玻里，有力開1.68倍主W！（now633台周一凌晨2：45直播）


祖雲達斯家陣落後畀榜首AC米蘭4分，要保住贏聯賽冠軍機會，之後每場波1分都不能少。睇祖記近期表現只可以講中規中矩，一班前鋒好似胡仙歷同馬特尼頻頻浪費入波機會，以致球隊經常唔失波但就入唔到波。

拿玻里連續兩場聯賽失分

不過正所謂「家有一老，如有一寶」，即使迪比亞路體能今非昔比，但憑住豐富經驗，戰鬥力絕不比後生仔差，上場贏國米都係靠迪比亞路後備入替奠勝，賽後睇番唔少報道都大讚「老金童」場外場內好有感染力，相信佢點都會過番兩招入波必殺技畀隊友。


有消息話祖記高層季後唔同迪比亞路續約，佢又點會唔想贏個聯賽冠軍為自己留個美好回憶？「斑馬軍團」戰意如虹，對住連續兩場聯賽失分、又有中場當拿度養傷嘅拿玻里，撐佢哋主場贏完再贏！