睇好「地上最強」晉級

猪拉多纳

03/04/2012

AC米蘭今晚出訪魯營球場唔易踢，就連身為AC名將嘅巴里斯都老實不客氣，指「地上最強」巴塞先係晉級熱門。曾經「嘜」盡天下前鋒嘅佢，坦承佢嘅一班後輩對住當今球壇第一球星美斯，似乎都無能為力，睇嚟AC想晉級真係要靠奇迹先得。

「美斯真係好難嘜！」

巴里斯表示：「睇完首回合之後，我依然認為巴塞先係晉級熱門，我相信其他意大利球迷都會有類似睇法。當然，我哋首回合冇失波，已經達成目標，今晚次回合唔可以話全無機會。」呢位一代意大利名將指出，前鋒伊巴謙莫域嘅發揮，以及尼斯達嘅演出將會成為AC爭勝嘅關鍵。


球員時代被譽為全球最佳清道伕，巴里斯無論面對任何前鋒都未驚過，不過講到要防守美斯，巴里斯話：「真係好難！美斯走位非常出色，佢總能夠搵到空位突破，或者為隊友作出助攻。我哋要守住美斯，必須要全體提高警惕，盡全力一拚。」