領先3粒照攻尼科西亞 皇馬大搏甩髀

猪拉多纳

04/04/2012
文： 麥馬拿仁

歐聯八強次回合皇家馬德里主場迎戰塞浦路斯尼科西亞，皇馬首回合領先三球，會唔會收韁？以上圈巴塞為例，「地上最強」首回合作客贏利華古遜三比一，次回合照炒七比一，證明西甲班霸於歐聯勒都勒唔住，相信今晚又係C朗拿度表演時候，入球大細中位數調至3.5球冇有怕，照捧大盤！


（有線62及202台周四凌晨2時45分直播）


皇馬教練莫連奴注重防守，部署極具戰術性，以佢穩陣性格，首回合贏緊三粒，次回合必勒住麾下戰將，尤其係嚟緊西甲要惡鬥華倫西亞。但此套理論只可用於波圖、車路士及國際米蘭身上，對皇馬而言唔啱key。事關皇馬於莫帥麾下已蛻變為全攻型球隊，踢法非常侵略性，近八主場一共轟入三十球，以大細中位數3.5計，其中七場開大，日前西甲更射破今季百球大關。

分組賽「其他」有辦睇

近期莫帥更派C朗、賓施馬、希古恩齊齊首發，攻力更上一層樓，上仗作客奧沙辛拿，賓施馬射入「雲巴士頓式」世界波、C朗三十五碼抽埋去又入，呢班射手依家入少粒都唔舒服，聰明如莫帥又點會無端端走去勒住佢哋？雖然今戰莫帥會收起部分主將，但一班後備如卡卡、格尼路、紐尼沙軒等都唔嘢小，佢哋鬥心強，皇馬攻力不容小覷。


睇番皇馬分組賽賽事，佢哋於篤定首名出線情況下，最後一仗主場照炒弱旅薩格勒布戴拿模六比二，開出「主其他」波膽，比數絕對值得參考。


尼科西亞能夠殺到入八強，已寫下塞浦路斯足球輝煌一頁，過唔到皇馬呢關根本非戰之罪，可以鬥「銀河艦隊」，機會可一不可再，球員必想於巴拿貝球場入波名留青史，今場朝聖情緒濃厚，皇馬要學巴塞贏七個一皮？唔難喎！