磐田開季對辦盃仔取「鑽」

猪拉多纳

04/04/2012
文： 朱楓

今日朱楓踩過界推介日聯盃，心水係磐田山葉嘅2.1倍主W，佢哋開季表現好對辦，射手前田遼一仲着晒火，今晚喺A組主場迎戰有兩大主力停賽嘅浦和紅鑽，預計可藉地利贏波。（開賽時間：周三晚6：00）


記得細個時朱楓都幾迷日職球星，最記得磐田山葉當年有鄧加同史基拉斯。相隔咁多年，磐田當然已經面目全非，但仍然係日職中流砥柱，今季仲打得唔錯，聯賽以4戰3勝1和戰績排第2，喺日聯盃A組首戰亦旗開得勝打殘大阪櫻花，當中前鋒前田遼一最近仲連續3場有波入，今晚隨時又冧莊，畢竟磐田喺日聯盃成績一向唔錯，自1992年創辦以來，就曾5次殺入決賽，結果兩次封王。

紅鑽兩大主力坐波監

至於浦和紅鑽，朱楓就記得細細個打Winning時最鍾意用「野人」岡野雅行，以速度屈落底線出地波畀福田正博射空門。上季差啲喺日職降班嘅紅鑽，今季表現大有改善，喺日聯盃A組首戰亦打響頭炮，暫時喺日職亦只係輸過1場咁大把，不過日前作客打和川崎前鋒嘅代價就唔細，中場阿部勇樹同後衞槙野智章兩位啱啱先由歐洲回流嘅日本國腳齊齊領紅，今晚都要停賽，作客磐田唔似有運行。


日聯盃A組

賽制：

由18支日職球隊參加，名古屋鯨魚、柏雷素爾、大阪飛腳及FC東京因要角逐亞冠盃，於小組賽輪空，直接進身淘汰賽階段。餘下14隊將分成兩組，進行單循環分組賽，每組首、次名躋身8強。