華倫絕地反擊AZ

猪拉多纳

05/04/2012
文： 法達斯維

歐霸盃八強次回合今晚上演，勢成西班牙兵團天下，畢爾包及馬德里體育會有望保住領先優勢闖四強，首回合落後一比二嘅華倫西亞，於上場聯賽留晒力，擺明要喺蝙蝠洞主場反擒荷蘭阿爾克馬爾（AZ），華倫質高有鬥心，「讓球主勝」博得過。（有線64及204台周五凌晨3時05分直播）


華倫近年穩坐西甲三哥，但近期表現下滑，馬斯泰拿球場的噓聲此起彼落，令教練艾美利備受下台壓力。

上圈炒燕豪芬有辦睇

其實，今季華倫實力較前幾年遜色，在巧婦難為無米炊下，該隊年年做到「三哥」，艾美利都算係咁喇！不過，綠茵場上成敗論英雄，有媒體舊事重提，話前任教頭朗奴高文搞到「蝙蝠」雞犬不寧，最終好歹都捧番個西班牙盃先走，艾美利令華倫重返正軌，反而只安於歐聯席位，球迷批評佢哋缺乏榮辱感。


球迷永遠是對的，既然華倫暫時西甲前四位尚穩，又殺入歐霸八強，艾美利點都要同球迷交代。上仗主場對同市死敵利雲特，艾帥刻意收起主力，射手蘇爾達杜全場休息，艾美利心意路人皆知，面對近況麻麻的阿爾克馬爾，只落後一球有力收復失地，「讓球主勝」有分頭抵捧。


睇番上圈十六強賽事，華倫遇上歐戰經驗較阿爾克馬爾更豐富嘅另一荷甲兵燕豪芬，華倫在主場都贏四比二，更添今場大勝信心。