英超開快車曼聯路易行

猪拉多纳

05/04/2012
文： 阿水

啲老行尊成日同阿水講：「賭場專收叻仔！」你以為自己賭波精、賭馬勁咩？往往就輸得你最大鑊。近排阿水有個艇仔老友輸到爭落周身債，幾乎要走佬，計我話幾時都係小賭怡情算啦！


阿水個老友K平時喺馬場打滾，仲有份收啲外圍馬，平時同啲練馬師同騎師相熟嘅佢，以為自己熟知一切，平時收飛間中仲會自己食咗就算，夠信心甚至加注出擊，手風順嗰陣梗贏得多，早排手風唔順，輸完再追數，結果搞到周身債，要周圍撲水，認真冇陰功。K哥自己一家大細，都係靠做艇仔養家，賺賺埋埋唔夠自己一鋪清，今次佢叫做靠老友暫時渡過難關，但成班老友真係多得佢唔少，希望佢及時醒覺，否則冇人救得到佢。

波歷克解凍撐利華古遜

講番今個禮拜賽事，要注意有復活節快車，特別玩英國波真係要小心。不過班霸曼聯認真好彩，周日鬥完昆士柏流浪，周三先再鬥韋根，兩支對手都係弱旅「依絲執」，上盤讓多多聲都唔驚。


另外利華古遜啱啱炒咗教練杜治，改由希比亞接手，老將波歷克據聞將會獲得解凍復出，成班波士氣好番，周日對住護級分子漢堡，應該可以贏波扭轉頹勢o架。