韋斯咸爭升「班」冇留手

猪拉多纳

06/04/2012
文： 亨格比利

季初唔少球迷都睇好韋斯咸可以取得直接升班資格，偏偏呢支英冠球隊最近跌晒Watt，搞到班Fans跌晒眼鏡。亨格比利收到風，韋斯咸球迷「反Sam」情緒高漲，艾拿戴斯係時候交功課，今晚到訪死氣沉沉嘅班士利就係反彈良機，一於捧1.67倍客W。（now638台周六凌晨0：15直播）


踏入3月，韋斯咸近8場聯賽有6場失分，已經跌番落第3位，直接升班機會大減。查實「錘仔幫」人腳超班，衰在經常捉到鹿唔識脫角，好多場波都贏形勢失分，上仗對雷丁本身踢得好哋哋，弊在早早有麥克盧保傷出，領隊艾拿戴斯又怕死換後衞丹尼哥連斯出嚟頂上，最終輸到2：4，畀班Fans鬧到狗血淋頭！

班士利近6戰輸5場

賽前韋斯咸副主席巴迪就向「大Sam」派定心丸，講明就算今季衝超失敗，都唔會炒領隊，大佬咁睇你，今仗冇理由唔做番齣好戲架。適逢今晚對手班士利近況仲衰，對上6場波輸咗5場，加上隊長積及畢打菲特因傷提早收咧，中場積獲得同前鋒華斯迪離隊後戰力亦大減，搶分心切嘅「錘仔幫」3分志在必得。