車仔撼韋根 預咗「大」駁火

猪拉多纳

07/04/2012
文： 張志德

同一樣食材，落喺唔同廚師手上，出嚟嘅菜色都會唔同。鬼Sir唔係講食經，而係講緊車路士。其實佢哋陣容冇改變過，只係看守領隊迪馬堤奧同班球員比較夾，車路士球員一向係受軟唔受硬，只要你氹得佢哋高興，自然交到成績。今場車路士主場對韋根，鬼Sir相信兩隊會毫無保留，大駁火場合捧大盤最着數。（有線301及201台周六晚10時直播）


車路士近3場比賽都贏晒，幾位球員包括費蘭度托利斯、魯爾梅利斯及林柏特等等，狀態都有明顯改善，真係行步路都爽過人。據悉迪馬堤奧係一個溫和派領隊，給予球員好大自由度，而咁啱車路士球員就最Buy呢套，大家咪一拍即合囉！


就近期幾場比賽所見，其實車仔班球員真係踢得開放咗，三線球員喺走位時亦唔會太過拘謹。依家車路士好似係為求開心而比賽，故今晚對住韋根亦都一樣，繼續奉行開心足球，一於攻到佢嘔。對面韋根就冇咁過癮，話晒都要搶分護級，點會同你玩玩吓。實在韋根近期表現都唔差，連續4場不敗兼場場有波入，相信佢哋都唔會縮住嚟踢咁被動，預料兩隊都會踢得積極，有望上演入球騷。