巴塞「-2」照屈「基」

猪拉多纳

10/04/2012
文： 走肖

入60球定70球，聽落分別唔大，但對新球王美斯嚟講，就絕對唔係咁講。足球歷史上，個人單季入球紀錄係70球，依家美斯60球在手，今晚巴塞隆拿喺西甲主場對基達菲，為爭標當然唔會手軟，美斯要真正成為史上最強，巴塞「-2」都要照捧1.52倍「讓球主勝」。 （now632台周三凌晨3：00直播）


由原本以為要提早扯白旗，到依家追到落後4分，而且仲有場「國家打吡」等緊巴塞同皇馬，呢場喺魯營出擊當然殺無赦。根據紀錄，歐洲聯賽單季入球紀錄係德國「轟炸機」梅拿喺1972/73年球季創出嘅67球，除非美斯突然受傷，否則幾乎肯定會改寫歷史，但佢應該未夠喉嘅，入波唔會畀佢停。


根據有關紀錄，美國球員Archie Stark喺1924/25年球季，出戰當時嘅美國聯賽攻入70球，當然，比賽水準同現時嘅西甲完全冇得比，但作為新球王，美斯當然希望真正成為史上No.1，更何況近排佢進入瘋狂狀態，根本自己都可能唔記得，到底今季入咗幾多球，上晒身好難有人阻到佢。

基達菲柏度李安打柴

另一方面，基達菲同皇馬都係來自馬德里，佢哋對住巴塞似乎踢得特別醒神，雖然過去5次作客魯營得2和3負，但當中3次輸波，都只不過僅輸1球，可以話有晒交代。不過咁，基達菲後備陣容好曳，中場柏度李安同後衞盧普又養緊傷，面對緊密賽程隨時踢到氣咳，熱捧巴塞「讓球主勝」有着數。

橫數千軍

巴塞主場6連勝


‧近6場主場賽事全部獲勝，其中5場開大。

‧美斯近4場主場賽事入11球。

基達菲作客頂多入2粒

‧係今季首支成功擊敗巴塞嘅球隊。

‧今季每場作客未入多過2球。