貝迪斯頂得住皇蘇

猪拉多纳

10/04/2012
文： 吉拿甸奴

費托唔識入波，巴洛迪利定時失控，主要係因為佢哋自信崩潰同情緒不穩。為咗踢好波，西甲貝迪斯請咗個靚女心理治療師專責照顧球員，結果成功令魯賓卡斯度重拾射門鞋。今晚皇家蘇斯達喺主場對貝迪斯，氣勢輸蝕唔似開到W，貝迪斯受讓平半捧得過。（開賽時間：周三凌晨2：00）

魯賓卡斯度「好番」勁入波

今季貝迪斯曾經輸到仆直，前鋒魯賓卡斯度難免遇上入球荒，據講佢本身有心理毛病，不過喺靚女醫生拉美莉絲引導下，佢逐漸回復自信，最近4場勁入3球。之前貝迪斯以2：0打沉馬拉加，先開紀錄嘅魯賓卡斯度就發晒狂衝去深情擁抱拉美莉絲，而且咁嘅慶祝方式唔係第一次，簡直當正對方係救命恩人。


仲有呀，辛達告魯斯今季喺貝迪斯都有7個聯賽入球，佢由條鹹魚變成似番個前鋒，相信拉美莉絲嘅功勞好大。依家貝迪斯未真正上岸仲要搶分護級，照計魯賓卡斯度同辛達告魯斯會入多幾球，報答靚女醫生關心。對手方面，皇蘇基本上靠借用嘅卡路士韋拿獨撐大局，只要嘜得住佢，貝迪斯要搶分絕對唔難。