紅軍跌Watt冇力讓波

猪拉多纳

10/04/2012
文： 查理阿蛋

出名鍾意鋤強扶弱嘅利物浦，今晚喺英超快車作客布力般流浪，小妹當然捧1.72倍「讓球主勝」啦！紅軍近9戰贏得1場，踢出嚟既冇鬥志亦冇狀態，搞到領隊杜格利殊都冇晒符，今鋪造訪火力強勁兼為護級搏甩髀嘅布力般，真係唔使旨意有好下場！（有線200及300、廣東體育周三凌晨3：00直播）


由杜格利殊帶領嘅利物浦，固然比以前鶴臣時代好好多，可惜過咗成季，班新兵唔止磨合唔到，仲愈踢愈差兼冇火，前線入唔到波係慣例，上半季嘅穩健防守亦隨住盧卡斯收咧而不復再，小妹望住愛隊踏入2012年後只係贏過2場聯賽、對住下游球隊更全部冇好結果，真係極度心酸！

叫「國王」寫報告解釋

最慘嘅係「國王」杜格利殊沿用嘅戰術，令安祖卡路爾、佐敦軒達臣等本身極具質素嘅球員無用武之地，搞到士氣直插谷底，就算佢幾有威望都好，交唔到貨就始終無法令人信服。難怪有消息話，球會老闆約翰亨利會喺周末足總盃準決賽前飛去英國，搵杜帥「照肺」，仲要「國王」喺季尾交報告解釋紅軍點解踢得咁曳，如果紅軍繼續頹落去，杜帥隨時「王冠」不保。

布力般為護級搏甩髀

利物浦一啲威勢都冇，反而身處降班區嘅布力般為咗逃出生天，肯定全力同紅軍死過，雖然佢哋連輸3場，但係其實呢班波近6次主場只係輸過畀曼聯同紐卡素，對其他對手當然有力一搏啦！唔好忘記佢哋嘅鋒力喺英超排前列位置，絕對有力射穿利物浦條跌Watt防線，就算贏埋都唔出奇o架！

橫數千軍

布力般近戰旺開細


‧近6場得3勝2負1和，其中4場開細。

‧近6次主場對利物浦，有4次保持不敗。

紅軍2012作客僅1勝

‧近6場得2勝1和3負，其中4場開大。

‧踏入2012年後，聯賽只得1場作客勝仗。