AC復活割「禾」青

猪拉多纳

10/04/2012
文： 力奇

歐聯出局兼冇埋個聯賽一哥位，意甲AC米蘭今晚復活節快車最後一擊，再唔贏波今季隨時乜都冇。主帥阿里基備受壓力，急需一場勝仗解困，可幸佢哋今仗有兩大進攻高手施多夫同奇雲保定復任正選，對住已經上岸鬥志麻麻嘅基爾禾，1.5倍客W唔難開出。（now633及660台、中央5台周三凌晨2：45直播）


連續4場不勝，AC嘅狀態毫無疑問唔多理想，歐聯不敵「地上最強」巴塞尚算情有可原，但連喺意甲對住卡坦尼亞都贏唔到，上輪對住費倫，夠膽死主場領先一球下畀對手反勝2：1，難怪出面吹晒風，話今季一旦AC贏唔到聯賽冠軍，主帥阿里基頭上烏紗一定不保。

施多夫 奇雲保定復出搏殺

當然，球隊狀態差，唔代表無力反彈，阿里基深知近排惡戰連場，都有為今仗做輪換，其中組織力極強嘅施多夫同專射世界波嘅奇雲保定上仗都冇踢，今晚擔正自然唔會留手。至於上場只後備出場嘅羅賓奴亦有望踢番正選，後備席又多番病愈復出嘅卡斯辛奴，一旦咬唔入對手，阿里基都仲有大把籌碼去變。

基爾禾等抖暑Hea住踢

基爾禾呢邊，2連勝狀態的確好，佢哋目前以31戰得42分排第9，已經達到球隊目標，基本上護級成功。事實上，上仗佢哋贏完卡坦尼亞後，無論將帥都講話鬆一口氣，擺到明已經放鬆心情等抖暑，你唔係仲想佢哋今場會搏命呀？仲有，睇番對賽往績，AC近6次同基爾禾交手全勝，近4季出訪基爾禾都贏1球，所以力奇今鋪唔貪心，齋博個單W，呢份復活節禮物勝在穩陣嘛！

橫數千軍

基爾禾幾乎場場失波


‧31戰入30球為全意甲第3少。

‧主場近7戰得2勝1和4負，6場有失波。

AC交手6連勝

‧近4次作客基爾禾均勝1球。

‧近6次交手全勝，共入13球失3球。