拖肥糖硬淨紅軍啃唔落

猪拉多纳

14/04/2012
文： 江忠德

之前曾經講過利物浦「核心價值」係永不放棄嘅精神，呢種精神喺上場絕殺布力般流浪重現，不過係由一班後備軍擔綱演出，今日喺足總盃4強大戰愛華頓，紅軍又會用番之前所謂嘅主力陣容，睇怕幾難啃得落「拖肥糖」！

杜格利殊臨場指揮一般

愛華頓近5場4勝1和，場場踢到飛沙劈石都照樣殺敵，所以根本毋須懷疑佢哋嘅作戰狀態。雖然「拖肥糖」領隊莫耶斯對住紅軍輸多贏少，但係亦試過喺重要戰役搞到死敵一戙都冇，最經典係3年前足總盃淘汰紅軍，家陣球隊氣勢咁強唔難落足料照辦煮碗。


紅軍美國班主同領隊杜格利殊嘅「深層次矛盾」，結果搵咗總監高莫利做「替死鬼」，但係咪以為炒咗佢就解決到問題。「國王」喺大賽臨場指揮效率一般，若今場換人變陣唔夠當機立斷嘅話，隨時又畀「拖肥糖」打亂陣腳。