拜仁防線見真章

猪拉多纳

17/04/2012
文： WENDY

今晚歐聯四強首回合大戰，作為「反拜仁聯盟」主席嘅我，梗係唔撐佢哋啦。雖然話歐聯決賽會喺番拜仁主場安聯球場舉行，老實講無論決賽喺邊度踢，隊隊都會全力以赴，今場平手盤，小妹捧皇馬。

C朗賓施馬玩晒

今晚雖然唔睇好拜仁，但唔排除佢哋會入到皇馬波，始終列貝利、馬里奧高美斯等人有入球能力，後者今屆歐聯已累積十一個入球，再加上拜仁先踢主場有啲蝕底，首回合一定狂攻，務求贏波。拜仁名宿碧根鮑華賽前仲好鬼大口氣，話皇馬遠遠唔及巴塞，拜仁絕對有機會擊敗對手喎！講到咁，贏唔到咪好瘀？


不過，皇馬始終質素高過拜仁，今屆五場歐聯作客，除咗作客去到嚴寒嘅莫斯科同中央陸軍打平外，其餘都成功取勝！特別要留意賓施馬，佢喺歐聯除入咗七球外，亦貢獻咗五次助攻，配合頻頻入靚波嘅C朗，以拜仁劣質後防，睇怕都守唔住。